INKAWU ITYIWA ILILA (Ibali likaSigqibo)
16 May 2018
Siphilisiwe Ngemivumbo YaKhe
20 March 2024(IMIBONGO)
Lo ngumqulu wemibongo othe wapapashwa yiNKUTHALO MEDIA (PTY) LTD
Iinkosi mazithambe izicaka zona zizole! Eli liqula lokuqabula xa ufile lunxano, ikwalichiza kulowo ungumlwelwe. Isipholisi manxeba kulowo umanxeba-nxeba. Injongo engundoqo weli qula kukubuyis’ ukutyeba kwesiXhosa sakowethu. Nanjengoko uninzi lwethu sele lumke nomrhiba wolwimi lwesiNgesi. Eli qula likwajolise nasekuhlaben’ ikhwelo. Lihlabela abo bathe gabhu kwezaseNtshona babuyel’ eMbo! Sithi khanikhe nirhabule kule ngcaza ididiyelwe ziintsana zenu. Nihluze ezo ntlenge nizakudibana nazo ningakhonyuluki kuba sisesenyeleni noko. Ngethemba lokuba nakuyonwabela mzi kaNtu. Amathol’ anyongande kukudlelana!
LIYABONA GINYIGAZI: Ndazalwa ngomhla we-30 kweyeSilimela ngowe-1997 eMaxama, kwidolophu yaseDutywa. Ndizalwa ngongasekhoyo, uNtombizanele Ginyigazi nowandishiya ndiselula endishiya kwizandla zika makhulu uNombulelo Ginyigazi, nosengumzali kunanamhla.Ndifunde eMaxama S.P.S, phantsi kwenqununu uZ. Khahlela, nalapho ndiphumelele ibanga lesine, ndaphuma ndaya eMazizini J.S.S phantsi kwesandla sikaMnu. M. Dubula, nalapho ndinqakule khona ibanga lesixhenxe, ndiphume ndaya kwisikolo samabanga aphakamileyo iMazizini S.S.S phantsi kwengqwayingqwayi uMnu. X.V Ningiza, kwalapho eDutywa. Ndabanayo nenyhweba yokuya kuthi gxada kwaNokholeji, iWalter Sisulu University eMthatha, ngowama-2015 nalapho ndenze khona isidanga se-B.Ed (FET): Humanities.Esikolweni isiXhosa ndisenze njengolwimi lwasekhaya, yenye yezinto ezindenze ndasithanda nangakumbi isiXhosa esi. Enye into endenze ihlombe kulwimi lweenkobe yiminyhadala ebisenziwa ezikolweni ngosuku lwenkcubeko, apho kaloku kubambejembeje elowo nalowo egaxele, exakathe okusukuba kusisinxibo senkcubeko yakhe.
IVIWE MATHE: Ndiligqabi lomnquma womqguba kummandla wakuQumbu eSulenkama kwilali yaseNtabasigogo. NdinguNgcuse, uGcala, uNtlangwane isiduko. Ndizalwa ngubawo uNzimeni Mathe ongasekhoyo kunye nomama uNoasanda Mathe. Amabanga am aphantsi ndiwafunde eNtabisigogo J.S.S phantsi kwengxilimbela yakwaNxuba, nalapho ndihlangene khona nomagrazula wetitshalakazi yesiXhosa, uMbokazi kwaWalaza lwahluma kangoko uthando lwam kolu lwimi. Amabanga aphezulu ndiwenze eSulenkama S.S.S phantsi kwend-edeba yakwaSikhosana, kwaMemka. Ndaphumelela apho ibakala leshumi elinesibini emagq-abini ngowama-2014. Ndibenethamsanqa lokuya kufuthwa kwaNokholeji, iWalter Sisulu University eMthatha kwiphiko laseNMD ngowama-2015. Nalapho ndithe ndenza isidanga seBed. Humanities kwezobutitshala. Kulwalapho ndihlangene khona neenkcacholo neenkcalacha zesiXhosa endingabalula kuzo uNkosazana Madolo obenefuthe elikhulu ekukhuliseni inkenkqe yokubhala kum. Ndiye ndasiphu-melela eso sidanga ngowama-2018.
GUBELA SIPHOSENKOSI: Inkaba yam ikummandla waseDutywa, ndizalwa ngutat’ uSot-shaper Gubela kunye nomama’ uNolulamile Gubela ze ndiseyimveku ndakhuliswa ngutat’ uNkululeko Geni kunye nomama’ uNophelo Geni. Ndiwafundile amabanga aphantsi eMtomboti J.S.S kwalapho eDutywa. Ndiphume apho ndaya kufunda isinala eJ.S Skenjana S.S.S kwakwisithili saseDutywa.Imfundo enomsila ndiyifumene kwiYunivesithi yaseTranskei, iWalter Sisulu University ngok-wale mihla. Kulapho ndithweswe khona isidanga seB. Ed (FET): Humanities.Ndibonakalise umdla kulwimi lwenkobe kwasekukhuleni kwam, kuba phantse zonke iincwa-di ebezibakho ekhaya bendizifunda ngomkhulu wona umdla. Ukusoloko ndithene mbende neencwadi zesiXhosa eziluncuthu mazangwa zindenze ndiluthande nangakumbi olu lwimi, ndiluthethe, ndilubhale.
